الكانيون البحري بمحمية نبق أو الغرقانة

الناس اللي بتسافر شرم المكان دا موجود في اول محمية نبق اللي ممكن الوصول ليها بالعربية عادي جدا او باي مواصلة تاكسي او ميكروباص

وهو موجود بعد مدخل المحمية بحوالي 300 متر تالت مدق يمين

المكان عبارة عن شق بحري بين الشط وجزيرة على بعد متوسط 20 متر تزيد جهة اليمين وتقل جهة الشمال او اليسار

الكانيون البحري او الشق زي ماهو واضح في الصور والفيديوهات عمقة حوالي 3 متر في المتوسط ومليان شعاب مرجانية واسماك ملونة وممكن سلاحف بحرية

الجزيرة بتظهر وتختفي مع حركة المد والجزر البحري وخلف واخر الجزيرة من جهة البحر المفتوح حيد مرجاني في منتهى الجمال مليان بكل الاحياء البحرية من اسماك ملونة وسلاحف بتظهر كتير

الاغرب من دا كله واللي محدش يعرفه غير العاملين في المحمية وناس قليلة جدا جدا جدا ان بعد نهاية الجزيرة من جهة اليسار وشوية في البحر جوة حوالي 50 متر من الجزيرة بيعيش حيوان الاطوم أو عجل البحر أو الدوجونج حسب كل واحد بيسميه ايه وهو نوع من الثدييات البحرية منتشر في البحر الاحمر بدءا من مرسى علم وجهة الجنوب لكن ايه اللي وصله محمية نبق الله اعلم

المكان دا من كام سنة كان شط فيه خدمات كراسي وشزلونجات وخيم لكن للاسف اتشالوا لكن ميمنعش اي حد داخل المحمية وهو في طريقه للمانجروف يعدي يعمل غطسة هناك ويستمتع بالمكان بس ياخد مية حلوة للحما وجزمة بحر او زعانف

ملحوظة : بعض الفيديوهات طويل شوية حوالي 4 دقايق لشرح المسافة ما بين الشط والجيرة وومدى الجزيرة ..

يا رب تستمتعوا

المكان محمية نبق (الغرقانة) جنوب سيناء شرم الشيخ

تعديل : ممكن رؤية طيور الباتروس او القطرس (نوع من النوارس) واقفة على الجزير وقت الجزر البحري