خلال زيارتك لجورجيا، تستطيع مشاهدة جبال القوقاز الفاتنة، وانت تنتقل من مدينة تبليسى العاصمة الى مدينة وباتومى، حيث السماء الصافية ،والهواء النقى، ولا يفوتك زيارة متنزه ناشيونال توشيدى الوطنى Tusheti National Park الأكثر جمالاً وسحراً، وهو منحدر من جبال القوقاز من جهة الشمال، أيضاً يمكنك العثور على أعلى قمة فى اوروبا فى جورجيا متمثلة فى قمة جبل آلبروس حيث يصل ارتفاعه الى 5642 متراً، هذا بخلاف المئات من سلسلة الجبال القوقازية الضخمة التى تمتاز بها طبيعة جورجيا الساحرة، لابد من قيامك برحلة للجبال؛ لتحكم بنفسك عليها، وتستطيع عادة الوصول الى هذه الجبال بداية من مدينة تبليسى العاصمة فى غضون ساعات قليلة بالسيارة، فلا تفوتك التجربة
السفر إلى جورجيا : التأشيرة و التصريح الأمنى
يسأل الكثيرون عن كيفية الحصول على تأشيرة سياحية للذهاب الى جورجيا من السفارة و كيف يمكن استخراجها الكترونيا ؟ و كيفية الحصول على التصريح الامنى و ماهي الاوراق المطلوبة فى الحالتين ؟
– جورجيا بلد سياحية جميلة و بسيطة غير مكلفة اذا قارنتها بدول كتير اخرى .. يكفيك لزيارتها من 7 الى 10 ايام .. بلد تجمع بين الحضارة و التراث و الطبيعة، جبال و شواطئ و انهار.
شاهد إيضاً افضل 16 منطقة سياحية ساحرة يمكنك زيارتها في مراكش
أولا التقديم للفيزا عن طريق السفارة الجورجية :
– الاوراق المطلوبة :
جواز سفر ساري – كشف حساب بنكي لاخر 3 شهور فيه مبلغ مش اقل من 10.000 جنيه عليه عمليات سحب وايداع مش معاك المبلغ بس حسابك عليه سحب و ايداع تقدر تخلى والدك يحولك المبلغ على حسابك و بعدين تطلع كشف الحساب و بعدها رجع فلوس والدك تانى لحسابوا بعد استلام كشف الحساب من البنك.. و أيوة ينفع حساب الوالد أو الوالدة او دفتر توفير تقدموا – خطاب من العمل “لو انت طالب بتجيب شهادة قيد من الجامعة” – حجز طيران وفندق مبدئي – تأمين طبي – صورتين شخصية خلفية بيضاء 4×5 – الأبليكيشن اللى هتعمله من موقع السفارة + تحديد الميعاد فى السفارة) كل الأوراق تكون مترجمة للإنجليزية .
– خطوات التقديم :
1- هتدخل موقع السفارة هنــــا
2- هتملئ الأبليكيشن من الموقع وتكتب كل بياناتك وتواريخ الذهاب والعودة وبعدين تطبعه وتوقع علي آخر صفحة وترفع الأبليكيشن تاني على الموقع بعد التوقيع.
3- أيداع 20$ فى حساب السفارة الجورجية فى بنك CIB
4- تحميل ايصال البنك بالإيداع – جواز السفر – حجز الفندق المبدئي – حجز الطيران المبدئي
5- تحميل صورة شخصية مقاس 4*5 خلفية بيضاء حديثة
6- تحميل كشف حساب لاخر 3 شهور برصيد لا يقل عن 10 ألاف جنيه مصري.
7- تحميل التأمين الطبي ويكون على قد المدة اللى هتقضيها فى جورجيا.
8- تحدد موعد لتقديم الأوراق فى السفارة .. وهتطبع كل الأوراق وتروح السفارة فى الميعاد المحدد.
– عنوان السفارة الجورجية :
11 ميدان اسوان، المهندسين ، الجيزة، مصر .. رقم التليفون: 0020233044768
لازم الأبليكيشن والحجوزات والتأمين الطبي تكون كلها بنفس المدة اللي هتقصيها فى جورجيا لأن الفيزا بتطلع بعدد الأيام اللى كاتبها فى الأبليكيشن
ثانيا التقديم على الموافقة الأمنية السفر إلى جورجيا ( التصريح الامنى ) :
كل فترة بيمشوا على شروط جديدة .
– خطوات استخراج الموافقة الأمنية:
1- بعد استلام الفيزا من السفارة بتروح مجمع التحرير وتصور الفيزا والباسبور (لازم تكون عارف اسم والدك خماسي وتاريخ ميلاده لأنهم بيطلبوهم منك هناك)
2- الموافقة الأمنية بتستلمها بعد 4 أيام .. صلاحيتها شهرين من تاريخ الإستلام.
– العنوان :
مكتب رقم 15 – مكتب ظابط الإتصال – الدور الأول – مجمع التحرير- ميدان التحرير ,
مواعيد العمل من السبت للخميس من 8 صباحا لـ 1 ظهراً
ثالثا فيزا جورجيا الألكترونية :
لو مسافر من بره مصر الموضوع سهل جداااااا انسى كل الخطوات الى فوق .. تقدر تقدم علي الفيزا الالكتروينة و توصلك عالايميل بعد 5 أيام عمل و بتكون صالحة أقل من90 يوم .
– خطوات التقديم ل فيزا ألكترونية :
1- هتملئ البيانات المطلوبة على الموقع الإلكتروني هنــــا
( حروف الاسم كابيتال ذى الباسبور لتجنب الرفض )
2- تحميل صورة جواز السفر (سكان ملونة واضحة ) + صورة شخصية 4×6 خلفية بيضاء حديثة (لازم تكون الصورة مطابقة للمواصفات وإلا هتاخد رفض)
تقدر تعرف مواصفات الصورة من هنــــا
3- الدفع عن طريق الإنترنت ( 20$ ) .
4- طبع الفيزا الالكترونية و حجز تذاكر الطيران و الفندق ( لازم تكون معاك نسخة من حجز الفندق او الهوستيل او الجيست هاوس و انت مسافر عشان بيشوفوه هو و الفيزا الالكترونية قبل ما يختم على باسبورك ختم الدخول )
حالات لا تحتاج التقديم فيها الى فيزا لجورجيا لا ملصقة ولا ألكترونية :
– اصحاب جنسيات دول مجلس التعاون و اصحاب الاقامات فيها (قطر، السعودية ،سلطنة عمان، البحرين والكويت ) باستثناء بعض الدول و تقدر تعرف اكتر من السفارة نفسها ..
– اصحاب الجنسية الروسية و ايضا الولايات المتحدة الأمريكية، جمهورية ليتوانيا، الاتحاد السويسري، ألمانيا الاتحادية، كوريا، التشيك، هنغاريا، بولندا، سلوفينيا، الدنمارك، النرويج،السويد، إسبانيا، بلغاريا، سلوفاكيا، رومانيا، أستونيا ولاتفيا الأوروبية،
– مواطنى الدول الأعضاء في الاتحاد الأوروبيبيدخولوا جورجيا ببطاقة الهوية فقط
-مالكى وثائق سفر وصلاحيات من منظمة اليو أن UN
– السوريين والعراقيين لا يحق لهم دخول جورجيا إلا إذا كان معاهم إقامة بإحدى دول الخليج ذى ما ذكرت فوق .
الاوراق المطلوبة عن الوصول في مطار جورجيا
1- تأمين طبي : تعمله من شركة Allianz او Travel Choice مثلا لدول الاتحاد الاوروبي و البحر المتوسط تكلفته 71 ج تقريبا للاسبوع!
2- حجز فندق :تقدر تحجز من علي موقع هنــــا تعمل اكاونت علي الموقع و تختار المدينة اللي هتقعد فيها في جورجيا و تختار هوستيل تكلفته من 4 دولار لحد 15 دولار في الليله بس و انت بتختار هوستل حاول يكون في وسط العاصمه زي شارع روستافيلي مثلاً او freedom square و يكون ال reviews عليه كويسه! بدل اما تروح و تتمرمط! ولو وصلت و الهوستل معجبكش قضى فيه ليله واحده اللى انت دفعت فلوسها و دور على هوستل تانى .. بتحدد المدة اللي هتقعدها اسبوع مثلا لو هتكلف 70 دولار انت بتدفع 12% فقط من اجمالي المبلغ و بيجيلك رساله علي الايميل بتاعك بالحجز المبدأي و اما بتسافر و بتوصل الهوستل بتدفع باقي المبلغ!
3- الاثبات انك معاك الفلوس اللى تغطى اقامتك و مصاريفك اثناء وجودك فى جورجيا! يفضل و انت مسافر يكون معاك 500 دولار ع الاقل او كشف حساب بنكى بالانجليزى بيسألوا عليهم بنسبة قليله جدا بس بحيث تكون فى الامان بدل اما يحصل موقف يعكنن عليك الرحله و ترجع!
4-تذكرة طيران ذهاب و عوده و ارخص تيكت طيران هو علي شركة Air Cairo من مطار الغردقة تكلفته 2558 ج
تطبع التأشيرة 3 نسخ الوان .. نسخه للذهاب و نسخه للعوده و نسخه احتياطي معاك و متحجزش الطيران و الهوستل الا بعد اما تستلم التأشيرة عشان لو التأشيره اتأخرت الحجوزات متضيعش عليك!تطبع تكت الطيران و حجز الهوستل نسخه للمطار و نسخه احتياطي! و غالبا بنسبة 90% مش هيسألوك في المطار ولا هيشوفوا اي ورق معاك غير جواز سفر و التأشيره بس خليك في الامان و اعمل الورق دا و خليه معاك عشان لو حد سألك!
اول اما توصل روح اشتري شريحه ب 5 لاري و حط فيها رصيد ب 5 لاري و باقة نت 4 جيجا ب 10 لاري هيكفوك و هيفيض و اقوي شبكه هناك اسمها magticom و مقر الشركة في نص شارع روستافيلي ناحية الشمال! مع العلم الهوستل بيبقي فيه wifi اسرع من اللي عندك في مصر و الشوارع الرئيسيه فيها wifi مفتوح للناس!
بالنسبه للمواصلات ممكن تعمل اشتراك مترو معرفش بكام بصراحه بس مبلغ رمزي.
اقل اجره للتاكسى 1 لارى و اغلى اجره من 8 ل 10 لارى! و الاجره الشائعه لاكتر المشاوير فى العاصمه من 3 ل 5 لارى!
بالنسبة للاكل لو هتجيب اكلك و شربك و حاجتك كلها كميات كتير كمان من السوبر ماركت و تعمله بنفسك في الهوستل فدا هيكلفك حوالي 50 لاري للاسبوع الواحد يعني 200 ج تقريبا
لو هتاكل و تشرب بره فدا هيكلفك حوالي من 15 ل 20 لاري في اليوم
الاماكن السياحية اللى بنصح بزيارتها عند السفر إلى جورجيا
Kazbegi, Kakheti, Uplistsikhe, Davit Gareja, Batumi, Mtskheta, Svaneti Mestia, Kutaisi, Oktase, Stapalia, Prometheus Cave, Martivili Canyons , Gudauri
ومتنساش تعمل Rafting فى النهر على طريق Kazbegi او Mtskheta
كذا ملحوظة مهمه :-
– نصيحة من اهل جورجيا !! بلاش السفر إلى جورجيا فى الفترة من شهر سبتمبر و لحد نص دبسمبر البلد بتبقى ميته و مفيش حاجه تتعمل و الجو بيبقى حر جدا و زهق! سافر براحتك بقية شهور السنة البلد بتكون ممتازه!
– فى حالة انك حابب تروح Svaneti فانت هتحتاج تقعد اكتر من اسبوع لانها هتحتاج 3 ايام لوحدها على الاقل و لازم تحجز طيران داخلى فى جورجيا قبلها بشهر على شركة
و Vanilla Sky لان الاماكن كلها بتتحجز بسرعه و اكتر وقت مناسب ل Svaneti و Gudauri هما من شهر ديسمبر لحد شهر ابريل!
– التاكسى من المطار للعاصمه خد التاكسى من بره هيكلف من 20 ل 30 لارى.
– امثلة للاكل الجورجى : Khinkali , Khachapuri , Chanakhi , Churchkhela
الاسعار للوجبة من 2 ل 8 لارى حسب المطعم و الحجم
– مشكلة التواصل و اللغه ممكن تحلها عن طريق انك تستخدم جوجل للترجمه او تتواصل مع الشباب الصغير بيتكلموا انجليزي و نسبة كبيرة جدا من المحلات بتتكلم انجلش عادى! فالتواصل مفيش فيه مشكله هتعرف تتعامل!
-الشرطة هناك محترمه و عندهم تقبل لاى شئ مهما كان و بشوشين مفيش حد هيرخم عليك او يوقفك امشى و انت واثق فى نفسك مش مقلق تماما!
-البلد امان جدا نسبة الجريمة فيها تكاد تكون معدومه! امشى اى وقت لوحدك و انت مطمن تماما!
-اوعى تعاكس البنات مهما كانوا لابسين حتى لو ماشيه فى الشارع من غير هدوم لانها هتهزقك لانهم عندهم الطبع الشرقى و العادات والتقاليد فى الحاجات دى! لو مسافر عشان تعمل حاجه او تفتكر انك هتقضيها بنات فمنصحكش لانهم متشددين و ملتزمين! و البلد صغيره و بيخافوا من ان حد يوصل الكلام لاهلهم!
لكن تقدر تتصاحب على الناس هناك عادى جدا باحترام مهما كان جنسهم سواء من جورجيا او غيرها هتلاقى ناس كتير مسافره من كل الدول زيهم زيك اتعرفوا على بعض و اخرجوا فى جروبات!
– درجة الحرارة فى Tbilisi زى مصر لكن فى Kazbegi درجة الحرارة بتكون بين الصفر و ال 10 درجة مئوية بالنهار!
– التزم بالمرور والا عربية هتيجى تطيرك و الالتزام بقواعد المرور هناك و الاشارات اجبارى! و حافظ على نضافه الشارع و مترميش زباله او سيجاره على الارض الناس هتبصلك باحتقار و اشمئزاز!
– متستغربش ال BMW , Mercedes , VW هناك تاكسى عادى جدا!
-المصاربف : 2500 ج طيران
– من 700 ج ل 1000 ج هوستيل
– الاكل و الشرب و الخروجات دى ترجعلك و تختلف من شخص لتانى حسب مصاريفه الشخصيه!
التجربة دى عرضها الاستاذ @mohamdlsayed
